मोदी गाउँपालिकामा स्थानीय लघु तथा घरेलु उद्यमीद्वारा उत्पादित सामग्रीको बजारीकरणका लागि कोसेली घर सञ्चालन

काठमाडौं ९ बैशाख । स्थानीय लघु तथा घरेलु उद्यमीद्वारा उत्पादित सामग्रीको बजारीकरणका लागि कोसेली घर सञ्चालन गरिएको छ । पर्वत जिल्लाको मोदी गाउँपालिकामा लघु तथा घरेलु उद्यमी तथा कृषकद्वारा उत्पादित उपभोग्य वस्तुको एकीकृतरुपमा बजारीकरण गर्नका लागि कोसेली घरअर्थात् सौगातगृह सञ्चालनमा ल्याइएको हो । 
मोदी गाउँपालिका–२ पातीचौर बजारमा पसल सञ्चालन गरिएको छ । स्थानीय घरेलु तथा साना उद्योगीद्वारा उत्पादित वस्तु अल्लो तथा ढाकाको कपडा, जुत्ता, कोट, ज्वारीकोट, साडी, सिस्नो धुलो, लप्सी तथा अदुवाको अचार, क्याण्डी, बाँसका मुडालगायतका तयारी सामग्री र कृषकद्वारा उत्पादित तरकारी, मह, स्थानीय खसीबोका तथा कुखुरालगायतको एकीकृत बिक्री वितरण गरी कृषकलाई प्रत्यक्ष लाभ पु¥याउने उद्देश्यले पसल सञ्चालन गरिएको हो । गण्डकी प्रदेश उद्योग पर्यटन वन तथा वातावरण मन्त्रालय र स्थानीय मोदी गाउँपालिकाको सहयोगमा सो गृह सञ्चालनमा ल्याइएको हो । मोदी गाउँपालिकामा लघु तथा घरेलु उद्यमीको बाहुल्यता रहेको छ । स्थानिय कृषकले व्यावसायिक रुपमा विभिन्न वस्तु उत्पादन गर्दै आउनु भएको छ । अल्लो उत्पादनको प्रसस्त सम्भावना रहेको मोदीमा उत्पादित अल्लोका तयारी सामग्री, ढाका, विभिन्न जडीबुटी, फलफूल लगायतका सामग्री बिक्री वितरणका लागि उद्यमी तथा कृषकलाई सहज होस् भनेर सौगातगृह सञ्चालन गरिएको मोदी गाउँपालिकाका अध्यक्ष प्रेम पौडेलले बताउनु भएको छ ।     
  मोदी गाउँपालिकाले उद्यमीको प्रवद्र्धनका लागि अघिल्लो आर्थिक वर्षमा रु २० लाख र चालू आर्थिक वर्षमा रु ५० लाख विनियोजन गरेको थियो । सोही रकमले उद्यमीलाई व्यावसायिक सीप विकासका लागि तालीम, प्रविधि र मेशिन सहयोग गरेपछि घरेलु तथा लघु उद्यममा स्थानीयको आकर्षण बढेको गाउँपालिकाका लघु उद्यम शाखा संयोजक सीता शर्माले जानकारी दिनुभएको छ । शर्माका अनुसार अहिले गाउँपालिकाभित्र ३०० भन्दा बढीको सङ्ख्यामा सक्रिय उद्यमी रहेका छन् । गाउँपालिकाका कुना कुनामा उत्पादित वस्तु सौगातगृहमा ल्याएर छाडेपछि उद्यमीले तत्काल ५० प्रतिशत रकम पाउने र बिक्री भइसकेपछि सत्प्रतिशत रकम पाउने भएकाले सहज हुने भएको छ । मोदी गाउँपालिकाभित्रको उत्पादनलाई पहिलो प्राथमिकता दिने र त्यहाँको उत्पादनले नपुगेमा अन्य क्षेत्रमा उत्पादित सामग्री खरीद गरेर बिक्री गरिने सञ्चालक चन्द्र विकले जानकारी दिनुभएको छ । यसैबीच उक्त सौगातगृहको गण्डकी प्रदेशका उद्योग, पर्यटन, वन तथा वातावरणमन्त्री विकास लम्सालले आइतबार उद्घाटन गर्नुभएको हो । सो अवसरमा मन्त्री लम्सालले अब निर्वाहमुखी उद्यमलाई व्यावसायिक बनाइने गरी सरकारले बजेट विनियोजन गरेको बताउनु भएको छ । मुग्लिन, पोखरा विमानस्थल र राम्दीमा तीनवटा यस्तै कोसेली घर सञ्चालन गरिने र त्यसका लागि सरकारले रु ६० लाख विनियोजन गरेको लम्सालले जानकारी दिनुभएको छ ।(हलो खबर)

 

Comment