सुन्तलाको व्यावसायिक कृषि उत्पादन तथा प्रशोधन केन्द्र (जोन) सुरु

काठमाडौं ९ पुस । म्याग्दी, पर्वत र बाग्लुङका सात वटा स्थानीय तहलाई समेटेर सुन्तलाको व्यावसायिक कृषि उत्पादन तथा प्रशोधन केन्द्र (जोन) सुरु गरिएको छ । 
 सुन्तलाको व्यावसायिक खेती विस्तार, गुणस्तर सुधार, उत्पादन वृद्धि र बजारीकरणमा सघाउने उद्देश्यले कृषि तथा पशुपंक्षी विकास मन्त्रालयले प्रधानमन्त्री कृषि आधुनिकीकरण परियोजनाअन्तर्गत जोन कार्यक्रम सुरु गरेको हो।
न्यूनतम पाँच सय हेक्टर क्षेत्रफलमा सुन्तला खेती भएको भूगोललाई समेटेर कार्यक्रम सुरु गरिएको सुन्तला जोनका प्रमुख बोमबहादुर थापाले बताउनु भएको छ । बेनी र बागलुङ नगरपालिका, जलजला, रघुगंगा, मंगला, मालिका र काठेखोला गाउँपालिकालाई सुन्तला जोनमा समेटिएको छ । कार्यक्रममार्फत् नर्सरी स्थापना, बिरुवा उत्पादन, प्राविधिक सहयोग, कृषि बजार केन्द्र स्थापना, प्रशोधन केन्द्र, ग्रेडिङ तथा संकलन गर्ने गोदाम, सिँचाइ, कृषि औजार, यन्त्र उपकरण, प्रर्दशनी, बजारीकरण लगायतका क्षेत्रमा सहयोग गरिने थापाले बताउनु भएको छ ।
जोनमा समेटिएका कृषकलाई सुन्तला खेतीसम्बन्धी योजनाका लागि ५० देखि ८५ प्रतिशतसम्म अनुदान उपलब्ध गराउने व्यवस्था छ । आगामी आठ वर्ष सञ्चालन हुने कार्यक्रमबाट सुन्तलाको उत्पादन वृद्धि, गुणस्तर सुधार र आयात न्यूनीकरण गर्ने लक्ष्य छ । सम्बन्धित स्थानीय तहका जनप्रतिनिधि, कृषि प्राविधिक र अगुवा कृषकको गत असोजमा बेनीमा भएको भेलाले कार्यक्रम सञ्चालन हुने ५२ वटा वडा छनोट गरेको थियो। जोन नसमेटिएका सुन्तला उत्पादन हुने ठाउँमा पकेट क्षेत्र विस्तार हुने कृषि ज्ञान केन्द्र बेनीका बागबानी विकासअधिकृत भोजबहादुर थापाले बताउनु भएको छ । बेनी नगरपालिकाको भकिम्ली, बास्कुना, बागलुङ नगरपालिकाको भकुण्डे र सिगाना, काठेखोला गाउँपालिकाको रेश र बिहुँ, जलजला गाउँपालिकाको बाँसखर्क, मल्लाज, शालिजा र वनौमा कार्यक्रम लागू हुने भएको छ  रघुगंगा गाउँपालिकाको बेग, भगवती, पिप्ले, मंगलाको कुहुँ, बाबियाचौर, बरंजा अर्मन, मालिकाको देवीस्थान र बिम पनि जोनमा समेटिएको छ । कार्यक्रम सञ्चालन गर्न चालु आर्थिक वर्षमा ८४ लाख रुपैयाँ बजेट प्राप्त भएको छ।

Comment